Barómetro da cultura galega III

Este novo informe vén a completar unha serie de estudos promovidos polo Consello da Cultura Galega co fin de investigar a influencia da pandemia do virus SARS-CoV-2 e a enfermidade da COVID-19 nas empresas do sector cultural en Galicia. O presente documento constitúese como a terceira edición do Barómetro da Cultura Galega, cuxas primeira e segunda partes foron publicadas en xullo de 2020 e marzo de 2021 respectivamente. Se o primeiro barómetro deixaba constancia dos problemas das empresas culturais galegas para afrontar a severa caída da súa facturación e o aumento de despedimentos, no segundo detectábase certa mellora e proxectaba algúns sinais de adaptación á “nova normalidade”. A elaboración deste terceiro barómetro permitirá observar a evolución das empresas do ámbito da cultura en Galicia ao longo dos máis de dezaseis meses transcorridos dende que comezou a crise sanitaria.